يوميات طالب ثانوي (الخازوق) 1

بسم الله الرحمن الرحيم
مين مننا مش عايش في تعاسة ابدية بسبب الثانوية العامة
او مين معداش المرحلة دي
اظن مفيش حد معش الايام دي
مفيش حد ممرش بالنكسة دي
مفيش حد متعلمش عليه وعايش في مصحة نفسية بسبب خازوق الثانوية
الثانوية في كل مكان وكل شارع وكل بيت زي الخازوق بظبط
مبدئيا عشان محدش يفهم غلط الخازوق دة ببساطة


الخازوق من أكثر الطرق بشاعة في الإعدام و معاقبة المذنبين , إبتكره العثمانيون و اشتهروا به , ثم أخذه عنهم حاكم رومانيا الشهير آن ذاك " فلاد دراكولا " و الذي حكية عنه القصص و نسجت الخرافات و إليه ترجع أسطورة " دراكولا "





مصاص الدماء ,, يروى مرة أنه لما سمع بأقتراب الجيش العثماني قام بقتل جميع الأسرى المسلمين لديه و غيرهم من المساجين و علق على خوازيق طويلة و قد كان عددهم بالآف , فكان منظرهم كغابة من الأموات جذوعها الخوازيق و فروعها الجثث , و قد أقامهم في طريق الجيش العثماني بغية إرهابهم .

استنتاج بسيط :

الثانوية من أكثر الطرق بشاعة في الإعدام و معاقبة المذنبين

بعيدا عن جو اندر ورلد و الزومبيز و the walking dead اللي دخلنا فيه دة نرجع للنقطة الاساسية الخازوق

قصدي الثانوية

واحد يقولي الثانوية سهلة انتا مكبرها ليه
اقولوا حضرتك بتضحك علي مين ؟؟

طب حصدقك تعالي نمسك math كدة ونحللنا كام مسألت trig

انتا ياعم المثقف مش عارف احل المسئلة دي

بتقول اييه ؟؟ احلها بالقانون اللي خدناه في اولي ثانوي

شوفت انك بتشتغل نفسك

هو في حد راح المدرسة اصلا في اولي ثانوي ولا في حياته

انا كل صلتي بمدرستي الثانوية اني اروح اسجل اسمي وانوط من فوق السور






حتقولي دي مشكلتك انتا

حقولك مشكلت ايه يابو مشكلة هو انا لما اروح والاقي المدرس مسكلي خرزانة وعمال يربي ف كرشوا ويكرهني في ام المادة عشان اخد معاه درس هحب التعليم واحضر ؟؟
وبعدين فين المدرس الي بيشرح دلوقتي في المدرسة يا راجل كبر دماغك



لو روحت اديها (قمر علي الدسك)

طبعا كلنا روحنا حضانة وشوفنا الحاجات المعوقة الي كانت بيعلموهلنا ولما اقلكوا قمر علي الدسك تناموا
ولما اقلكوا شمس تقوموا عشان غالبا اقلكوا قمر علي الدسك تاني
ومرت السنين
واكتشفت ان نظرية قمر علي الدسك مكنتش مجرد حاجة بيلهوا بيها شوية عيال هبله
لا دي نظرية مفيدة للحياة الدراسية كلها
انا امتع ايام حياتي لما كانت في اعدادي
كنت اسهر لحد معاد المدرسة علي النت
وكان اياميها لعبة كوانتر وهاف لايف وفيفا 2007 وموصلين وصلة وافضل العب اونلاين مع الجيران لحد مبقيت بروفيشونال

اخلص الجيم واجري علي المدرسة اعمل احلي قمر علي الدسك
وطبعا مفيش ولا شرح ولا اي بطيييييييخ
حد حيقولي في مدرسين عندهم ضمير
عفوا انتوا مطلومين في البلد دي انتوا تخدوا اول سفينه وطيروا علي البلاد الي بتقدر العلم
وللاسف ديما تلاقي المدرس الكويس في المدرسة الزبالة والعكس

مقدرش انسي مدرس الكيمياء الاسطوري صاحب الحواجب التي هزت عرش مصر
الاستاذ طارق !!
الراجل دة سوكرة
تشوفه كدة تحبة لله في لله
تزويغ تلاقي
شرح متلاقيش
امتحانات مفيش اصعب من كدة
لا ويسبنا نزوغ وننزل ويخصم من اعمال السنة يعني حضرتك عايزني اسقط عشان اخود درس معاك
بدل مروح البلاج واعاكس البنات في الصيف

لا ولا الامتحانات
مفيش احلي من كدة بجد
بيجبلك حاجات اينشتاين وابن سينا والعتاولة ميقدروش يحلوها لدرجة انوا مرة قالي في مسألة في الامتحان اللي حطيتوا ليكوا دة معرفتش احلها شخصيا 

 طب وحضرتك جايبوا منين ؟ يرد بكل برود من النت




ومرت الايام وفضل الخازوق يطاردني
قولت اما اخد معاه درس وبالفعل روحت
اول مدخلت لقيته طلع خرزانة وقال 30 جنية يا حيوان انتا وهو

30 جنية ؟
ليه ياعم
دة انا لو خدت درس مع جابر بن حيان حيديني اوفر عليه

روحت قولت لبابا
قالي انا عيزك تسقط 30 جنية ايه دة انتا بتتكلم في تمن مرتبي يا بني ادم
يحاج نداء العلم ياحاج .. نداء دي تبقي خالتك
ومررت الايام وفضلت اتخزوق 3 شهور
وجية امتحان العلمي افتكر سعتها كانوا عاملين ضجة عليها
ولو قفلت امتحانات الشهر وامتحان اخر السنة وسقط في العملي
تشيل المادة هو كدة
ورمانا في معمل معفن ريحتوا عاملة زي الخرابة او جايز كان لسه مدهون المهم كان في ريحة وحشة اوي
الغريب ان كان في سبت مليان مشابك واضح انهم بيحاولوا ييسروا علي الطلبة بسد الانف من الرائحة


وجابلنا 4 انابيب ازاز وكوباية وترمومتر وشراب لحد دلوقتي مش عارف ايه علاقه الشراب بالتجربه !!
وقلنا يالا يا حبيبي
حطهم علي بعض وقيس بالترمومتر وادلق علي الشراب وشم
وقولي ايه دة انهي مادة
المهم عملت كل حاجة وجيت اشم
لقيتها ريحة صعببببببببببببببببببببببببببببه
ريحت عرق الشعوب كلها
يا فندم مش قااااااااادر ايه ياحج طارق دة
الريحة صعبة
الريحة اخترقت المشبك
انت كنت لابس الشراب دة وجاي تجرب الريحه فينا ولا ايه ؟؟
اخلص ياض اسم التركيبة اية
دة EFFF-HC-RE7A W7SHA-L ?

 غلط بررررررررة 

كنت عارف انه بره علي فكرة بس برضو بموت فيك يا طاروق !!
ومرت الايام وجاءت ليلة الامتحان بما لا تشتهي الحواجب

ادانا 43 ورقة انا فاكر سعتها خد علي كل ورقة 20 قرش واحسب يا حسااااب كان محسسني انه مقطعهم من علي الشجرة

قلنا دة كدة 20% من المنهج
قلتلوا ينهارك اسود
وال80% فين في جيبي ؟
قالي اخرص انتا الي مش بتذاكر
قلتلوا وانتا بتشرح حاجة اذكرها ؟؟
عمل فيها من بولاق الدكرور
 وروحت الامتحانات وفوجئت ان حتي مفيش 20%
الورق تبله وتشرب حواجبة

لولا ادهم اللي ورايا كان زماني شيلت طييييييين
مهو لو الحياة مفيهاش ادهم هنعيش ازاي بس ؟؟




ومرت الاسابيع وطلعت النتيجة
ومسكت الشهادة لقيت الاسامي بتاعت فصلي
ساقط
ساقط
ساقط
ساقط
ساقط
دور تاني
ساقط
ساقط
ساقط

الحقيقة مكنتش عارف ايه الفرق بين ساقط ودور تاني مال اتنين ملحق ؟!!

ولقيت اسمي انا وادهم
نجحناااااااااااااااااااااااااااااااااااااااا

ومن هنا روحت اروش علي الواد طارق
خلاص بقي ينسي الالقاب
مش نجحتتتتتتتت
وعملتلة بيدج علي الفيس بوك

الشعب يريد اسقاط حواجب مستر طارق

وحدث تفاعل كبير في المدرسة

ثورة طلاب مدرسة الفراعنة ضد حواجب مستر طارق

ومرت الشهور

وعادت الخزوقة مرة اخري

كابوووووووووووووووس الثانوية

مش عارف اذاكر

مش عارف اركز

بقالي 11 سنة مرفه وبلعب مفيش حاجه اتشرحتلي مفيش معلومه استفدت منها سواء ذاكرت او مذاكرتش !!

ودلوقتي لازم اذاكر عشان مستقبلي

طب ازاي منظومة ربتني علي الدلع 11 سنة وجاية ببساطة تديني خازوق الثانوية بكل حنان

مش دة برضو مخالف لشروط الكون العقلية
حقيقي الدنيا دي زي المرجيحة خازوق تحت وفوق

ويبقي الامل ان الواحد يجيب مجموع ويخش كليه الاعلام بس دة حيحصل ازاي في المنظومه المتخلفه وتنسيق كل سنه اللي بيبقي نار !!

الاجابة اكيد حتظهر مع الايام

الي اللقاء في حلقات اخري
دة لو مجتليش ازمه قلبية من الثانوية


*ملحوظة اخيرة لون الثانوية الاسود ليس مجرد تلوين ولا حبا في الرسم لان اصلا لحد دلوقتي مشفتش مدرس رسم بل هو يعبر عن الكلمة نفسها